Pero o optimismo e a tenacidade de Viana non poden agachar que o SERE se atopa nunha delicada situación económica, xa que os fondos se reduciron de forma notábel e centos de miles de refuxiados permanecen ainda atrapados en Francia e necesitados de axuda. Os problemas económicos amoréanse sobre a mesa da oficina de Viana na Rue Tronchet. Dende Perpignan, o delegado Carlos Ruiz advirte que moitos exiliados están en situación crítica ao non recibir o subsidio dende hai meses. Renée de Monbrison é a secretaria xeral do Comité Británico e reclámalle a Viana a entrega dos 25.000 francos mensuais comprometidos dende xullo polo SERE para poder continuar prestando a súa imprescindíbel axuda. O Comité encárgase da compra e distribución de roupas e alimentos nos campos de concentración e da entrega de subsidios. Tamén se ocupa da localización de nenos e nenas e da reunificación familiar dos refuxiados, ademais de xestionar tres colonias infantís. As demandas de recursos non cesan, e Félix de los Ríos, da Junta Pro Refugiados da República Dominicana, pídelle a Viana que o SERE faga fronte aos gastos de construción de vivendas e de posta en marcha de granxas para os refuxiados no país, ante o incumprimento dos compromisos do Goberno dominicano. Para afrontar esas graves dificultades económicas, Alejandro Viana quere que a austeridade guíe a xestión dos seus fondos. Con emoción reclámalles aos delegados en diferentes cidades francesas e norteafricanas os maiores esforzos e sacrificios, lembrándolles a súa privilexiada situación.
ROBERTO MERA COVAS
O Pomar 