NO CEMITERIO DE CORTEGADA DE MIÑO
Ben vin o gaio
do corpo labrado
na póla do pino delgado.
.
Ben vino o gaio
do peito chorido
na galla do pino brandido.
.
-“Ben haxas, gaio,
co teu cantorío,
que eisí labras o meu rechouchío…”
.
-“Ben haxas, gaio,
co teu leixaprém,
que eisí me brandeas o peito tamén…”
.
Ben vexo ao gaio
do bico amaranto
na maceira brava do campo santo.
.
Ben vexo ao gaio
co seu peteirar
orballada de frores ceibar
.
-“Ben haxas, gaio,
co teu abaneo,
que eisí compres as mandas do Ceo…”
.
-“Ben haxas, gaio,
ca túa depena,
que eisí me decoras a campa da Nena!…”
.
FERMÍN BOUZA BREY
O Pomar 