LECTURA AUTUMNAL
Na serán escalazada
remanece o meu fastío
no azul dos tolle-merendas
e no marelo dos vimbios.
.
Na brétema se arrandea
meu corazón esquencido,
mentras o orballo destece
os contornos fuxitivos.
.
Cando queiras podes vir,
feliz ensono perdido,
que a luz xa vai devecendo,
das mans escorrega o libro
e na fiestra, embarazados,
choran docemente os vidros…
.
FERMÍN BOUZA BREY
O Pomar 