.
Aos meus amigos de Guillade
Fora dono do casco de Plutón pra tornarme invisible
(descasí, non de todo): estar cos ollos ben abertos
na voz un gromo de silencio
-bufa a curuxa fóra-
estar aí na Taberna do Alén, a carón dese lume
entre rostros amigos, voces, espiritoso viño
e ver e comprender
Giordano Bruno
queimado en Roma
por ter pensado acerca do Universo, do Infinito e dos Mundos
e saber que hai un viaxeiro a piques de baixar do tren
en Compostela e que non dará chegado
onda nosoutros
porque esqueceu unha contraseña exacta
porque non trae a Palabra que nos faría felices
a Palabra perdida polos homes todos
hai tanto tempo.
FRANCISCO XOSÉ CANDEIRA
O Pomar 